Жақында «Алқа» баспасы қоғам қайраткері, жазушы, журналист Нәзипа Құлжанованың еңбектері жинақталған «Қазақ әйелдеріне манифест» атты кітапты жарыққа шығарған болатын.
Бұл еңбекте жинақталған бірқатар мақалалар мен аудармалар ғалым, зерттеуші Серік Негимовтың ізденістерінің арқасында табылған олжа деуге болады. Баспа басшысы әрі кітап идеясының авторы Бану Дәулетбаева ғалымның өзімен бетпе-бет жүздесіп, мол мұраларды табуға қосқан үлесі үшін алғыс айтып, батасын алып қайтты.
Қазақстан әлеуметтік ғылымдар академиясы академигі, филология ғылымдары докторы, «Өлең өмірі», «Ақын-жыраулар поэзиясының бейнелілігі», «Өнерпаздық өрнектері», «Шешендік өнер», «Халық ақындары творчествосының көркемдік сипаты», «Қазақ өлеңдерінің көркемдігі», «Ақын-жыраулар поэзиясы: Генезис. Стилистика. Поэтика», «Қазақтың сал-серілері», тағы басқа көптеген монографиялардың авторы Серік Негимов:
«Алаш қайраткерлері дегенде біз Нәзипа Құлжанованың есімін де айтуымыз керек. Оның Алашқа сіңірген еңбегін айта берсек өте көп. Мәселен, өзі оқыған әйгілі педагог-ғалымдардың еңбегіне сүйене отырып, солардың озық ойларын қазақ тіліне аударуы, орыстың классигі Максим Горкийдің революцияға қарсы шығармаларын қазақшалауы, шебер аудармашылығынан бөлек өзі жазған «Маржан» деген әңгімесінің өзі неге тұрады?! Жан-жақты тұлға болған ғой. Ал оның еңбектері өзінің лайықты бағасын әлі ала алмай келеді.
Нәзипа Құлжанова Абайдың екі өлеңін орысшаға аударып «Сибирский студент» деген журналға берген. Ол Абайдың кемеңгер ақын екенін танытуға барын салған, үлкен кештер ұйымдастырған қыз. Мен осындай мұраларын барынша жинақтап, 2004 жылы кітап шығарған едім. Ал бұл 3000 данамен шығып отырған «Қазақ әйелдеріне манифест» атты кітап — қаламгердің атын насихаттау жолында жасалған нағыз ерлік деп айтар едім. Біз осындай қазақтың қайраткер қыздарының есімін түркі дүниесіне, әлемге танытуымыз керек!» — деп ризашылығын білдіріп, тұсауы кесілген кітаптың жарыққа шығуымен құттықтап, ақ батасын берді.
