Әйгілі балалар жазушысы Бердібек Соқбақбаевтың «Он алты жасар чемпион» повесінің желісімен түсірілген телехикая эфирге шығады.
«Қазақстан» телерадиокорпорациясы халық арасында кең таралған шығармаға негіздеп 4 бөлімді телехикая түсірді.
Сериалда бас кейіпкер — табандылығы мен еңбекқорлығының арқасындабокстан Әлем чемпионы атанған ауыл мектебінің оқушысы Мұрат Батырбаевтың рөлін Нұрлыбек Есен және Әлібек Қосубақ сомдап шықты. Ал жаттықтырушы Николай Трофимовичтің рөлін Сергей Семыкин ойнайды. Туындының режиссері — Нұргелді Садығұлов.
«Он алты жасар чемпион» қаламгердің 1951 жылы жазған туындысы. Шығарма кейіннен бірнеше рет өңделіп, «Чемпион», «Жекпе-жек» атауларымен де жарық көрді. Ал бұл телехикая повесттің алғашқы экранизациясы.
