Калифорния губернаторы Гэвин Ньюсомның айтуынша, бұл өрт АҚШ тарихындағы ең ауыр табиғи апат болуы мүмкін.
Биліктің хабарлауынша, өрт салдарынан 24 адам қаза тапқан. 100 мыңға жуық адам қауіпсіз жерге көшірілді. Тағы 87 мың адам эвакуация туралы ескерту алды. Барлығы 12 300 ғимарат зақымдалған немесе қираған. Мүлкі қирағандар арасында Мел Гибсон, Энтони Хопкинс, Билли Кристал және модель Пэрис Хилтон сынды Голливуд актерлері бар. Қазіргі таңда өрттерден келген шығын 135-150 млрд долларға бағаланып отыр.
Лос-Анджелестегі орман өрті 8 қаңтар күні Голливуд төбесіне жақындаған еді. Алайда 9 қаңтар күні кешқұрым ол жердегі тілсіз жау ауыздықталған. Hollywood Sign Trust ұйымы тақтаның зардап шекпегенін хабарлады. Тек Голливуд белгісі орналасқан Гриффит саябағы сақтық шарасы ретінде уақытша жабылған.
Желіде Лос Анджелестің түгел өртеніп кеткенін бейнелейтін суреттер мен видеолар тарап кеткен. Бұл — фейк ақпарат екенін айта кеткен жөн. Кейбір суреттерде Grok жасанды интеллектісінің логотипті бар.
Лос-Анджелес аймағындағы өртке байланысты Grey’s Anatomy, Fallout, Suits: Los Angeles, Джимми Киммел шоуы және басқа да жобалардың түсірілімі тоқтатылды. Фильм премьералары, марапаттау рәсімдері, спорттық матчтар мен музыкалық қойылымдар да тоқтатылды.
