АҚШ-тың Калифорния штатында 7 қаңтардан бастап ірі орман өрті өршіп тұр. Әлеуметтік желілерде өрттің Лос-Анджелестегі аты аңызға айналған Hollywood белгісіне жеткенін көрсететін кадрлар пайда болды. Алайда, жергілікті тұрғындар бұл фотосуреттің жалған екенін айтып дабыл қағуда. Дегенмен, орманның алапат өртке оранғаны шынайы ақпарат.
Осы сағатқа дейін бес адамның қаза тапқаны белгілі болды, ғаламторда төтенше жағдай болған жерден жантүршігерлік кадрлар пайда болды. Округ өрт сөндіру бөлімінің бастығы Энтони Марроненің сөзіне сілтеме жасаған NBC News мәліметінше, Лос-Анджелестен ондаған мың адам эвакуацияланды.
Жағдайды қатты жел қиындатып отыр, бұл өртті сөндіруге кедергі келтіріп қана қоймай, ғимараттарға таралуына әкеп соқтырып отыр. Марроне жариялаған соңғы мәліметтерге сәйкес, бүгін Калифорниядағы орман өртінен бес адам қаза тапты.
Бүгін сондай-ақ америкалық модель және актриса Пэрис Хилтонның Лос-Анджелес округінің батысындағы Малибу қаласындағы үйі өртке оранғаны белгілі болды. Бұл туралы Пэрис Instagram-дағы парақшасында айтты.
«Отбасыммен отырып, Малибудағы үйіміздің жанып жатқанын тікелей теледидардан көруді ешқашан ешкімнің бастан кешіргенін қаламас едім. Қиындыққа тап болған немесе өртте құнды нәрсесінен айырылғандарға қарап жүрегім ауырады», — деп жазды Хилтон.
